Taruba US Tir den tesendaktep tajung ayutsü jangrar: Putin

Russia Tir, Vladimir Putin-i kümshi Moscow yimtiba nung agiba alima osangbener den ajurutepba sentong nung shilem agiba noksa ka yangi angur. (Moscow, December 17)

 Moscow, December 17 (Agencies): Taruba United States (US) Tir den tesendaktep tajung ayutsü jangraba olen ka Russia Tir, Vladimir Putin-i tanü Brehostibar nü metetdaktsüogo.

“Taruba küm agitsü ayongba US Tir election nung takok ngua US madak yimsü asütsü tashi benoker den tesendaktep tajung ayutsü jangrar,” ta kümshi agiba alima osangbener den ajurutepba sentong nung Putin-i tanü metetdaktsü.

US Secretary of State, John Kerry den tan hopta tetenzüklen ajurutepa senden amenba sülen US-i Russia den külemi lungjemer mangatettepbaren ajunga bentettsü tebilemba aliba osang angazükogo ta pai ashi.

“Syria lenir shimtsü tashi Syria nübur nem agütsütsüla,” ta shia, Syria nung tongpang rarabaren anenja yimtenren tebentetbaren metenzük tashi par Russia-i Syria nung mitkar tashi amshitsü lemtetba olen ka Putin-i metetdaktsü.

Ano, “Turkey-i kechi timtem ajanga ozü tayimtsü anüng tom nungi kazüka yok iba osang lemsateptsü melena, par linüki North Atlantic Treaty Organization (NATO) nungi ang teyari meshiba ajanga ozü Russia kanga jashidaktsüogo,” ta shia, Turkey mitkar tayimtsütemi par tayimtsü anüng tom nungi kazüka yokba sülen adokba mangatetepbaren bentettsüsa tang tensa ajurua mali ta pai ashi.

Alimai aijaka, Russia-i par mitkartem Ukraine-i yoka Ukraine anüdoklen tentetba Ukraine sorkar anemer den yaritepa mali ta pai nenshia ashi.

Paisa ashiba agi, Russia-i Ukraine anema tenokdangba sentong tasen benoktsü sentonga renema mali.