2014 küm India nung aluyimer 5,650 soseta asü

New Delhi, July 18 (Agencies) : 2014 küm India nung aluyimer 5,650 soseta süogo aser tasür timbaka Maharashtra, Telangana aser Chhattisgarh nungi liasü ta sorkar osang ka ajanga tanü metetdaktsü.
National Crime Records Bureau (NCRB)-i sayaba “Accidental Deaths and Suicides in India 2014” osang nung ashiba agi aluyimer 5,650 soseta asürtem rongnung tebur 5, 178 aser tetsür 472 liasü.
“Tasürtem timbaka Maharashtra nungi liasü aser iba state nung aluyimer 2,568 soseta asü. Iba sülen Telangana nung 898 aser Madhya Pradesh nung 826 asü,” ta shia lir.
Aluyimer tetsür timba soseta asübaji Telangana nung liasü aser par state sülen Madhya Pradesh aser Maharashtra na nungi liasü.
Senotsü maliba mesüra sentsüh agi tsühbangba aser kibong khuret balala ajanga soseta asürtem timba liasü, ta National Crime Records Bureau (NCRB) osang nungsa shia lir.
Tanüngba onüktem rongnung tsünüsenbongtsü junga madokba aser shirangba nungertem liasü.