Jaitley anentsütsüla mesüra cabinet nungi agientsüla: Kejriwal

New Delhi, December 17 (Agencies): Union Finance Minister Arun Jaitley maneni aija tanü Delhi Chief Minister, Arvind Kejriwal-i, Delhi and District Cricket Association (DDCA) nung ochimashi tai tonglokja aliba sadema bushisüngdangtsü asoshi Jaitley anentsütsüla mesüra Union Cabinet nungi agientsüla, ta takhangba agütsüogo.

Kejriwal-i ashiba agi, AAP-i pa anema tai tongloktsübaji Jaitley-i tamentaktak maka aser kuli maka ta jembibaji ochi masü, kechiyong pa anema benoka alibaji ken o kanga tulu, ta ashi.

“Jaitley-i osangkaket nung menangzükbaji ochi ama agitettsü asü (?) Pa anema ken o tulu benoka lir. Kechiba pai bushisüngdang nungi ajener (?) Jaitley-i sangdong ajanga menangzükba nungji ajemdaker bushisüngdang magii toktsüra coal aser 2G ken o nung tai tonglokja alirtema ajak toktsütettsü asü (?),” ta Kejriwal-i twitter ajanga ashi.

Delhi Chief Minister-isa, “Finance Minister anema benoka aliba ken o ji kanga tulu. Sen aika densema lir. Sadema bushisüngdangtettsü asoshi pa anentsütsüla mesüra agientsüla,” ta ashi.

Delhi and District Cricket Association mangatettep ken o nung Kejriwal aija Jaitley-i, Kejriwal-i osang tai proker, ta shiogo.

“2013 küm ni cricket administration toktsüogo. 2014 aser 2015 tatalokbatem kar den sentaktepja pai ni yangi densemdaktsütsü makok,” ta Jaitley-i ashi.

Finance Minister-isa, taoba UPA sorkari buhisüngdangtsü nungloktsüba telok, Serious Fraud Investigation Office (SFIO)-i jangja jangja, pai DDCA Tir ama shilem agibaji non-executive chairman ka ama liasü ta shiogo, ta metetdaktsü.

Tanep New Delhi nung osangbenertem senden ka nung AAP-i, DDCA nung Jaitley küm 13 Tir inyakba mapang senotsü nung ochimashi liasü aser company taila balala tenüng nung sen aika miimzüka agiogo, iba den külemi team shimba nunga ochimashi liasü, ta ashi.