FNR teloki NSCN-IM aser tangar teloktem ajurutepa jembidaktsüner

Dimapur, Dec.17 (TYO): Tang ama tensa tia ka nung Naga nunger asoshi tajungtiba yimten telatetba ka bener aruba agi lendongang ataloktsüsa tia ka nung lir, kechiyong tang India sorkar den Naga yimten ken o jembiba ya Naga nunger ajunga den masü saka NSCN-IM telok den dang renemba ken o ka asütsü ta yimya agi sayur, iba ama tangatetba jagi lendong tulu ataloktsüa akok, ta FNR teloki metetdaktsüogo.
Ajungbenaka, August 3, 2015 nü India sorkar o NSCN-M telok na tsüngda Naga yimten tebilemtsü ken o jembi tenzüktsü asoshi tangatettep ken o renemba sülen ola madoki mapang tatsüka arur külen tang FNR teloki parnok tangatetba metetdaktsüogo.
Naga nungertemi aginüba ama Naga yimten nüchiso bushir telok balala ajak longjemdaktsütsü aser ibaji ajanga yimten telatetba tajung kati arutsü teimla nung FNR teloki taoba küm ishika kanga meranga inyaka aruogo. Aji oda, parnok mapa ajanga Naga lima nung Naga nunger linük tenzükertem telok balala anogo shi azü tokshia katepa aliba tensa tia anendaktsür yimjung nung mapang talangka lia arudagi.
Naga nunger longjemer yimten telatetba kati arutettsüsa inyaktsü nükjidong yur tenzükba mapa ya anenra majungtsü alinungji, Naga nungertemi aser talisa ano Naga nunger linük tenzükertemi jungjunga bilemdanger tang asenoki ajuruba tebilemtsütem ya koktettsüsa inyakdaktsüner, ta FNR telokisa mepishia metetdaktsü.
India sorkar aser Naga nungertem asoshi teti atema Naga yimten tebilemtsü ya latettsü mapang tonga aruogo aser iba ya ajanga asenok dangi lendong aser maongka aruba asenoki metetter, anungji NSCN-IM aser tanga Naga yimten tenzüker teloktem ajaki iba tensa mapangji angateta linük tenzükertem telok ajaki iba maongka ya agitettsüsa inyakdaktsüner ta FNR telokisa metetdaktsü.
Tang ama tensa mapang nung NSCN-IM teloki tangar Naga yimten nüchiso bushir teloktem ajurua parnoki India sorkar den jembiba ajak süoka jembitsüla. Iba ama NSCN-IM teloki inyakbaji ajak asoshi tajung asütsü anungji tangar teloktemia iba ama mapang nung yimten tangatetba sayutsüla
India sorkar den Naga yimten telatetba ka renema bener arura, iba mapang nungji kija aser telok shingaia tangar jashitsüsa mesüra tashiyim mapa meinyaktsüla. Ibaji talisa NSCN-IM, India sorkar, tanga Naga nunger teloktem, state nung yimsüsürtem aser ketdangsertem ajak asoshi kanga tongtibang asütsü ta FNR teloki tekümdangtsü ken o ka metetdaktsüogo.
Iba ama lendong mataloktsüsa kümdanga aser mita alitsü atema FNR teloki arogo, lokti tentettem aser nübortem ajak dang mepishia metetdaktsüogo