Centre-i ozüng alema sen rizüngba mapa inyakba nung Ramdev-i mepelar

Lucknow, December 18 (Agencies) : NDA sorkari bendanglen nungi ozüng alema rizüngba sen bener arutsü atema mapa junga meinyaker saka Narendra Modi’er sorkari tekaratiba nung iba onük atema inyaktsü imlar, ta Yoga tesayur Ramdev-i ashi.
“Ni Modi aser Finance Minister Arun Jaitley na den jembiogo. Onoki iba onük mamadoki lir saka Modi’er sorkar nem mapang agütsürba dang. Pai ozüng alema bendanglen sen rizünga aliba bener arutsü imlar” ta Lucknow nung Ramdev-i osangbener dang ashi.
Delhi nung CBI-i Principal Secretary indang office mita reprangba atema Ramdev-isa ashiba agi, “Chief Minister kati pei tashi dak alia mapa inyakbaji Arvind Kejriwa-i tang mezüngbuba inyaker.”
Iba onük atema Kejriwal-i Jaitley aitsüba atema Ramdev-isa ashiba agi, “Ni kodanga Jaitley indang mulungsentsü anema jembiba mangashidang. Tang pa aitsüba atema sasa bilemer. Nisung ka aitsüdi ta süra, kuli tejangja alitsüla.”
Lucknow nung Patanjali megastore ka lapokba sentong nung Ramdev-i iba osang metetdaktsü aser pai ashiba agi, sangküm nungi par company-i bendan linüktem den sen crore meyirjang aika indang shishilembatsü sentong lir.