Japan-i aibelener 2 tepseta merenshir

Tokyo, December 18 (Agencies): O bendangeri o bendang agütsütsüren nung yarir jury teloki aitsür ka densema, Japan-i nisung tepsetba ken o nung ajemdaker tasüba temerenshi agütsütsü o bendanga agüja alir nisung 2 tashi tanü Hokolbar nü tepseta merenshiogo.
Shinzo Abe-i 2012 küm nungi tenzüka Japan Ato Kilonser menden benokba sülen tanü tashi nung par Japan-i aibelener nisung 14 tashi tepseta merenshiogo.
Tokyo yimtiba anasa, Kawasaki yimti nung nisung 3 tashi May, 2009 nung tepsetba ken o nung arishi küm 63 tain Sumitoshi Tsuda aitsü aser pa tanü lisü agi alenseta merenshi ta Japan Justice Ministry-i osang jangjashitsü.
“2009 küm nungi tenzüka Jury telok tenteta o bendang agütsübaren nung yaritepdaktsütsü tenzükba sülen Tsuda-ji Jury teloki aitsür mezüngbuba aibelener tepseta merenshir lir,” ta ministry-i shisem.
Japan anüdoklentip tsütsülen, Iwate nung arishi küm 52 tain tetsür ka aser lar jala 2006 küm tepsetba ken o nung o bendangertemi aitsüba sülen arishi küm 39 tain Kazuyuki Wakabayashi-a tanü tepseta merenshiogo.