Sangküm Mother Teresa nem ‘saint’ jaloktsütsü akok

Kolkata, December 18 (Agencies) : Asür Mother Teresa-i sayatenya mapa ka inyakba Pope Francis-i agizükogo aser iba ya ajanga sangküm la nem ‘sainthood’ agütsütsü lenmang sadema lapokogo, ta Kolkata nung archbishop-i Hokolbarnü metetdaktsü.
Mother Teresa taküm alidang Kolkata nung sensakertem aser teyari nüngdakbapurtem kanga yari aser sangküm September 4 nü la temeshi nisung ka liasü ta meshiteta moatsütsü imlar, ta Rome nung Catholic newspaper Avvenire osang ajanga metetdaktsü.
2008 küm Mother Teresa-i Brazil nunger nisung ka tekolok nung tumour aika adoka kangshia liasüba jungdaktsü aser iba sayatenyaji Vatican-i agizükogo, ta Kolkata nung Archbishop, Thomas D`Souza-i ashi.
“Rome nungi osang ka ajanga kü dang Pope Francis-i Mother Teresa indang tanabuba sayatenya agizükba metetdaktsü” ta D`Souza-i osangbener dang ashi.
Anogo asem tejakdang Congregation for the Causes of the Saints ajanga mongin nisungtem jatepa senden ka agi aser idangji parnoki Mother Teresa-i sayatenya inyak ta kuli agüja liasü, ta Vatican expert Stefania Falasca-i yashi metetdakja liasü.