AR purtemi school tanurtem khasetba aitsür

Dimapur, July 18 (TYO) : Assam Rifles purtemi July 16, 2015 nü Meluri sub-division kübok Wuzu yimtak school tanur ana khasetba mapaji aitsür ta tanü Honibar nü sangdong ka nung Naga Council aser Naga Women Hoho Dimapur nati metetdaktsüogo.
Assam Rifles purtemi nisung khasetba mapaji yangji alir nübortem o NSCN-K na nem tongloktsüba jagi ano tejashi madak tejashiang bendenloktsüogo ta Dimapur nung aliba lokti tentet tuluba anati metetdaktsü.
Meluri police station nung tenük kuli alirtemi FIR agütsüba osang nung ashiba agi, Assam Rifles Commanding Officer, Major Surinder Singh dang parnoki khasetba NSCN-K pur tasümangji yangji alir nübortem, par yimer asünungji, yangji aremtsü asoshi meshia liasü, saka nübortemi parnok jashitsüsa kecha meinyak.
Assam Rifles purtemi ashiba ama NSCN-K purtemi tashiyim agi parnok den adentsü asoshi tanurtem anir aoba mapaji odang toktsütsüla masü saka ano sepaitemi tai maketba school tanur khasetbaji tejashitsüka lir, iba ama mapaji odangbo meyutsütsüla ta parnokisa metetdaktsü.
” Asen lima nung AFSPA ozüng kübok “Disturbed Area” tensa tia nung ali tashibo, tasüsanger kibong nemji kodanga ochiobendang magütsütettsü aser Major Surinder Singh aser pa den alir sepaitemji kecha tai meinyak amai akümtsü, anungji kechisüdir süaka iba ama ozüng tamajung yabo asen lima nungi agientsüla ta Naga Council aser Naga Women Hoho Dimapur ajanga metetdaktsüogo.