Arunachal yimten mesüngjemtet mokdangba mapang nisung ka asü

Itanagar December 19 : Tang ya Arunachal Pradesh nung yimsü tesüdak Congress telok nung meputep adokba ajanga yimten nung petsaperong kanga lir aser Congress lanurtemi gari kata mejajadaktsüi nokdangba ajanga küm 60 tain shiranger nisung ka ki metongteti lenmang nung süogo.
Iba lendong ya Arunachal Pradesh Youth Congress (APYC) teloki Brehostibar nü Papu Nallah anasa NH-415 nokdangba ajanga ghonda asem dak tali gari kata mesenzüdaktsüi nokdangba ajanga atalokba liasü. Iba jagi senzüsenponger nübortem kanga timtemogo.
Iba mapang nisung ka tenüng agi, Karka Bahadur Chetry (60), R K Mission Hospital nung monga aliba mozü ki toktsür par alidak Kimin town bushia aoba mapang Congress lanurtemi nokdangba ya ajuru aser yangji pa tango tembang.
Pa ya hopta ana jakdang mozü kidangi bener ao aser pa den ajuruteptsü kinungertem kanga yongyaa liasü ta par kinunger kati ashi.
Chief minister Tuki nungitertemi sepaitem tsüngdang tyres ronga timtem agütsü saka sepaitemi kecha meshiteti repranga dang liasü. Iba timtem jagi National Highway nung lenmang anatsülen gari anendena liasü.
Chief minister menden raktepdang nübortemang kanga timatemer aser sorkar ketdangsertem dak temulung alemtsüla masü, parnoki lenmang nung nisung timatemba mekümzüktet ta lenmang nokdangba mapang timtem ajurur kati ashi.
Itanagar nunga Arunachal Pradesh Mahila Congress Committee (APMCC) purtem longkak aitba ajanga nisungtem timtem kanga ajurua liasü. Parnoki Governor J P Rajkhowa-i assembly session sangküm January 14 nü agitsü liasüba nungi December 16-i atsüzükba telemtetba aija liasü. Congress tetsürtemi Raj Bhavan lenmang nung angh anema ola adoka ayimtena liasü.
)