Yemen yimjung senden tamakok nung tembanger

Geneva, December 21 (Agencies): United Nations (UN)-i ayonger külen Yemen nung mangatettep adokba teloktemi Switzerland kübok Geneva yimti nung anogo 6 tashi yimjung senden amen saka iba yimjung sendenji tamakok nung tembangba osang angazükogo.

Yimjung senden takok ngua agitsü nükjidong nung yimjung senden amenba mapang nung Yemen nung mangatettep adokba teloktem rong nung meraratsü tezüngzüktep agia liasü.

Ajisüaka, Yemen Tir, Abdu Rabu Mansour Hadi-i aniba sorkar aser sorkar anemer Houthi telok na tsüngda mapang shia tongpang raraba den külemi, Saudi Arabia-i aniba teloktep Arab mitkartemi sorkar anemer tesep balala amaktsü maparen manenba ajanga tan yimjung sendenji tamakok nung tembangtsüsa akümba osang jangjaogo.

“Yemen nung tongpang raraba ajanga taoba anogo 3 tsüngda nung nisung 75 dak tema tepsetba osang jangjaogo,” ta shia, Yemen nung tongpang rarabaren manenba ajanga Geneva nung amenba yimjung senden tamakok nung tembangtsüsa aküm ta UN ambassador, Ismail Ould Cheikh Ahmed-i tanü Hombar nü sangoktsü.

“Geneva yimjung senden amenba jakdang agiba yimjung tezüngzüktep mapa küma mebenshiba ajanga tan senden tamakok nung tembangogo. Ajisüaka, tarutsü mapang nung yimjung tezüngzüktep tasen ka agiba sülen tan ama yimjung senden ayongtsü sentong lir,” ta pai ashi.

Tan senden amendang yimjung tezüngzüktep magitetti tamakok nung tembang aka, tan senden nung shilem agir Yemen sorkar aser sorkar anemer nati tejakleni mera tulu agiogo.

“Tan senden amenba ajanga telok anapronglai pua ayur nisungtem chiokba den külemi, tongpang raradak tesemtem nung talisa, Taiz yimti nung timtem toushi ajurua alir nüburtem nem nungdakba chiyongtsü aser teyari osettsüset tetsükdakba kecha meli agütsütsü lenmang lapoktsüogo,” ta pai shisem.

Tarutsü mapang nung yimjung senden maneni amentsü nükjidong nung tan senden nung shilem agirtemi Coordination & De-escalation Committee (CDC) tenteta UN aküm kübok mapang shia ajurutepsü alizüng yuogo ta Ahmed-i metetdaktsü.

Ano, mangatettep adokba telok ana tsüngda temulung lemtep tali alitsüsa lenmang balala bushitsü nükjidong nung senden balala ayongtsü sentong renemba osanga paisa metetdaktsü.

Parnoki taruba yimjung senden sangküm 2016 küm January ita tom tashi nung amentsü sentong renemba osanga angazükogo.

Yemen nung mangatettep adoka tongpang kanga sashia raraba ajanga tanü tashi nung niusng 6,000 shi asüba osang bushiteta lir ta UN-ia metetdaktsüogo.