Assam nung Manipur nungertemi tashi meshir

Guwahati, December 21 (Agencies) : Assam nung aliba Manipur nungertemi Assam nung parnok asoshi autonomous council ka tentettsü atema takhangba agütsür.
Assam nung winter assembly session alidang Manipuri National Council (MNC)-i Dispur Last Gate nung takhangba agüja lungkak aitba sentong ka ayongzüka agi.
Assam nung Manipur nunger lokti, yimten aser sobaliba temeten wazüka ayutsü atema MNC-i takhangba agütsür.
MNC-isa tang aliba Manipuri Development Council (MDC) ya assembly nung ozüng ka ajanga Manipuri Autonomous Council (MAC) melentsü atema akhanger.
Manipur nunger lokti, sobaliba, yimten aser rongsenren tsütsü renloktsü atema iba takhangba agütsür, ta MNC president N Babu Singha-i metetdaktsü.
NDC tenteter küm 5 arur saka parnoki Manipur nunger renloktsü atema mapa meinyakteter. MNC nem budget lemzüktsüba jagi Assam kübok district 13 nung alir Manipur nunger nütsüng lakh 5 ser tema nüngdakbatem mepirir, ta Singha-isa ashi.
MNC-isa assembly nung menden asem mekazüka ayutsü aser Lakhipur, Sonai, Hailakandi o Hojai ama Manipur nunger teimba ser aliba constituency tem delimitation atema akhanger, ta MNC tirisa metetdaktsü.
Ahom aser Manipuri chuba yimlitem indang tamaitsütem aser tesentaktep alibatem Assam-i wazüka ayutsüla. Item rongnung Sivasagar nung Mithapukhuri, Guwahati nung Manipuri Rajbari, aser Karimganj nung Pratapgarh Pukhuri nunger dena lir, ta MNC-isa takhangba agütsür.