Neilangunuo Sanchu-i 8buba Angels Mega Model Hunt nung takok nguogo

8 buba Angels Mega Model Hunt 2015, Nagaland nung takok angula, Neilangunuo Sanchu den first runners-up Azho Kalpana (abelen) aser second runners-up Alen Phom nunger Bamboo Hall Kisama nung December 21 nü tangokba noksa angur.

Kohima, December 22 (TYO): 8buba Angels Mega Model Hunt 2015, Nagaland nung Neilangunuo Sanchu-i takok nguogo. Arishi küm 23 tain, Sanchu ya graduate teacher ka aser la tar feet pongu ser inch trok (5.6 feet) lir. Bamboo Hall, Kisama nung Hombar aonung agiba, iba tetoktepba nung la den külemi shilem agir parnok 8 dang nungi la tajungba süa iba takok ngutet.

Linük nung tetsür mezüngshiba aser tim mesüi benshiba tsütsü tasüngdangba ka langzü dang lai, “Marendaki tasü ita mera tasen agiba ajanga tetsür tashi itdaktsütsü aser tebur o tetsür na tebendang mali ta angatetdaktsütsü,” ta langzüa liasü. Kasa tasüngdangba ya parnok shilem agir ajak dang asüngdanga liasü.

Kasa tetoktepba nung Azho Kalpana-i tanabuba aser Alen Phom-i tasembuba jenjangtem nung takok ngua liasü.

Iba tetoktepba sentong ya ‘Get Gorgeous Society Nagaland’-i acha ayanga agi aser Nagaland Contractors’ & Suppliers Union-i teyari agütsü.

Tetoktepba shilem tanga kar nung takok angurtem yamai:- Most Gorgeous – Azho Kalpana, Beautiful Skin – Nchumbeni Shitiri, Most Congeniality – Vekusalü Venyo, Best Cat Walk – Vilika Shohe, Best Body – Nonying P. Konyak aser Best Modern Ethnic Wear – Rini-u Kapfo. Item takok angurtem nem NCSU Tir Pele Khezhie-i senpet agütsü.

Temaba jenjang nung takok angur parnok asem-i senpet anguba dang masü saka Guwahati nung January 2016 nung akatsü aliba 13buba Mega Miss North East tetoktepba nung adentsü moangka-a ngutetogo. Guwahati nung ananü amungtsü aliba sentong indang Fashion Carnival nung parnok asemprongla kanga nüngtugu model tem den ramp nung külemi jajatsü maongka-a angutsü. Iba den külemi Leeway Leisure Resort Guwahati-i parnok asem ya angati anendaktsütsü nangzükogo.