Kütsü temang tajungba kümdar: Esha Deol

July 19, 2015: Hindi film actress aser yimtenren lenir Hema Malini tawa gari lendong nung kanga mejungi yirua liasü aser Deobar nü lar jala Esha Deol-i, la temang tajungba kümdagi, ta metetdaktsü.
“La (Hema) tang tanepdak lir aser nenoki sarasademtsüba ajanga la ajungba kümdagi. Anungji asenoki ajak la nem teka maatsüdi,” ta film yanglur Subhash Ghai indang institute convocation sentong nung Hema Malini’er jala Esha Deol-i ashi.
Esha-i, “Sobaliba tetsü ka jala ama tanü ni yangi nüma tanga noktaker. La ya tashi aliba tetsür ka lir. La ya pei tangatetba nung taküm aliba tetsür ka lir. La mulungsentsü temerük tetsür ka lir,” ta ashi.
Laisa Subash Ghai tenüngsanga, lai-a pa indang film ka nung shilem agiogo ta ang süner, ta ashi.
July 02, 2015 aonung actress aser BJP MP, Hema Malini’er gari anisangi gari mekümdangi aniba ajanga tanur ka asü aser Malini mejungi yirua liasü..
Malini’er gari Mercedes ji tanga gari ka den tsüktepba lendong nung arishi küm pezü tetsür chanu ka asü aser Hema Malini den tangar nisung pezü tashi yirua liasü.
Arishi küm 66 Hema Malini yiruba zübo asoshi Jaipur nung aliba Fortis hospital nung operation agia liasü.