BSF indang tayimtsü lendong nung nisung 10 tsükset

Dec. 22, 2015 nü Delhi IGI airport anasa Border Security Force  indang tayimtsü ka tsükoka aliba noksa nung angur. Iba lendong nung tayimtsü nung mena alir nisung 10 prong asü. 

New Delhi, Dec. 22 (Agencies): Tanep tayimtsü tila ka apusor mapang tatsüka tsüngda Delhi airport anasa tsüokba lendong nung Border Security Force (BSF) 10 tsüksetogo.
Tanep 9:45 ako meta küm metsü tain tayimtsü, Beechcraft ji Ranchi-i apusor minute ana sülen tsükok. Tayimtsü nungji mena alir ajak- ketdangser asem aser senior technician tenetprongla iba lendong nung asü. Tayimtsü nungji Pilot ana- BP Bhatt aser Rajesh Shriram na, Deputy Commandant D. Kumar, Inspector RP Yadav aser SN Sharma, Sub Inspector Ravindra Kumar, Sunder Singh aser Chotte Lal, Assistant Sub Inspector DP Chouhan aser Constable K Rawat nunger liasü.
Tayimtsü nungi teyari meshiba mesüra tanga tongtepratep osang kecha maliasü, ta osang ajanga ashi.
Iba tayimtsü jagi airport technical tesem jara dak atsükba sülen sewage treatment plant ka nung anen. Iba tayimtsü nungjagi mi adoka apok aser kanga mejungi raksa.
Tenük kuli alir kati, “Onoki tayimtsüji perepzüa alua aayanger kar mapa inyaka aliba anasa jara ka nung atsükba angu. Aayanger ana yiruogo,” ta ashi.
Union Minister of State for Civil Aviation, Mahesh Sharma-i iba lendong kuli bushisüngdangtsü tuyuogo, ta metetdaktsü.
Beechcraft tayimtsütem ya aiben tongti ketdangsertem aser minister temi amshir. Tayimtsü nung mena alir rongnung Ranchi nung helicopter ka yanglutsüpur senior technician tem-a liasü.
Osang ajanga angazükba agi, iba tesem jagi fire brigade sepaitem oa liasü ajisüaka nisung shinga mekümzüktet.
1994 küm yangluba tayimtsüji touzük seret 5,669 liasü aser August 3, 1995 nü BSF-i passenger tayimtsü ka ama registration agi. Iba tayimtsü nung tayimtsü anir ana den nisung 10 menteter.Tanü tsükokba tayimtsü ya tawa ang BSF-i rong tepshia yanglushir liasü.
Iba osang angashia Home Minister Rajnath Singh-i twitter ajanga, “New Delhi, IGI airport anasa BSF tayimtsü ka tsüokba osang angashia kanga jashir. Lendong atalokba tesem jagi aor,” ta ashi.