Tamangba yimsü ajaki ochi tesayuba agütsür: Mohan Bhagwat

Mumbai, January 03 (Agencies): India nunger sobaliba nung chichiba tashi lir ta shia tanü RSS tongti, Mohan Bhagwat-i, tamangba yimsü ajaki asenok dang ochi benshitsü aser meraratsü sayur, ta ashi.
Bhagwat-isa, India-i alima dang tejakleni aotsü lenmang sayutettsü aser ainkartemi sayubaji pei kidang tama benshiba sülen ang tangalen proktsüla, ta ashi.
“Mapang ajak nung shisa tamajungertem lir. Parnokji teti alitsü. Iba denji kasa mapang ajak nung nisung tajungertema lir. Tajung ka inyaktsü atema nisung shingaia metsübutsüla aser tebilemtsütem koktettsü atema lenmang bushiba nung tasümeiti malitsüla,” ta Bhagwat-i yangi sentong ka nung jembidang ashi.
“Tasüita alitsü atema nisung ka shi nung tashi ita alitsü menüngdak, saka ajemaluba tashi nüngdaker. India atema chichiba tashiji sobaliba. Asen linük nung tamangba yimsü ajaki ochi shia alitsü aser meraratsü sayur,” ta pai ashi.
RSS tongti Mohan-isa, linük ka tashi ita alitsü atema India lanurtem iba denji tsüngkang medema terenlok alitsüla, ta ashi.
“India linüki alima dang tejakleni aotsü lenmang sayutettsü. India tashi ita alitsü atema linük lanurtem terenlok kadaktsütsüla. Lanurtem dang chichiba tesayubatem agütsütsüla,” ta pai ashi.
“Iba atemaji nisung ka taküm nung asen ainkartemi sayubatem benshitsüla, iba sülen pei kidang benshitsüla, iba sülenji ang tangalen proktsüla,” ta paisa shisem.