Canada nung soa inteter India nunger ka kahset

Toronto, July 19 (Agencies): Calgary city, Canada nung arishi küm 20 tain, Canada nung soa inteter India nunger ka gari nung lia kahset. Pa ya tamalen nungi nükpeta aliba ka amai ajiteter, ta osang ajanga metetdaktsü.
Tasüngsang, Steven Sharda ya July 11 nü gari nung lia injang agi akah aser pa den külemi aliba medemer kata injang agi kanga mejungi yiru.
Lendong atalokli tenaprong mozü kidangi anir ao, saka Sharda-bo mozü ki matongdang asü aser medemsangji kanga mejungi lir.
“Ya tamalen nung arishia aliba mapa ka amai onoki bilemer, injang akhartem jagi tasüsang aser par medemsang na meteta lir,” ta sergeant Doug Andrus-i ashiba Calgary Sun ajanga metetdaktsü.
Sharda densmea taküm iba yimti nung nisung 13 kahsetogo/tepsetogo, ta osang ajanga ashi.
Iba lendong ya July 11 nü atalok saka police-i tasür tenüng tejangjabo July 14 nü ang metetdaktsü.
Lendong atalokba tenük kuli alirtem dang asüngdangya süogo aser police-i ‘surveillance cameras’ ajanga tangoka aliba video ajak reprangdangdar.
Andrus-i ashiba agi, yirur alisang taküm mesamadaktsüner, pai ano bushisüngdangertem den o mejembiteter.
“Pa mozü tesashi agiba ajanga police aser bushisüngdangertemi asüngdangya mesüteter,” ta pai ashi.
Iba lendong ya tawa anüdoklentip tsütsü mangatettep tulu adokba dak sentakba maparen kar asü (?), ta police-i kanga junga asadangtsü merangdar, ta Andrus-isa ashi.
Tang tashi nung iba lendong kechi kuli ajanga atalok ibajibo jangjaogo.