ISIS-i Europe nung lendong agütsütsü renemdar

July 19 (Agencies): Islamic State telungpur temi Bosnia nung aliba yimtsüng ka nung mima ali alia ayutsü tenzükogo aser shibai metet iba tesemji tiyong ser parnoki Europe anüolen lendong agütsütsü renemer asütsü akok, ta Deobar nü media ajanga metetdaktsogo.
Tan ita ishika tsüngda nung Osve yimtsüng nung training agir IS züngsem 12 Syria ao aser parnok rongnungi nisung pongu süogo, ta Sunday Mirror osangkaket ajanga metetdaktsü.
Tang IS teloki ali aliba tesem ya Syria, Iraq aser North Africa nunger kiralongrartem jajaba Mediterranean tzüyim anasa aliba ajanga parnok atema jenjang tajung ka lapoker, ta osang ajangasa ashi.
Bosnia nung aliba iba yimtsüng ya ISIS teloki training agitsü asoshi amshir aser iba tesem nungi parnoki Europe anüolen lendong agütsütsü renemer asütsü akok, ta security temi ashi.
Kiralongra anemer mongin, Dzevad Galijasevic-i, “Iba tesem ya ajanga nübur aika Syria-i ogo aser maneni odar,” ta ashi.
“Iba yimtsüng nung ISIS teloki tenem aliba tesemlen timba alia ayur, koba ajanga tsükchir aruba jangja angutsü. Iba ya ajanga kiralongra mapa yang nungi tenzüktsü, ta jangja-jangja meteter. Jihad atema meraranerbo shinga mali,” ta Galijasevic-i ashi.
Osangkaket tem ajanga ashiba agi, tenemlen aliba yimtsüng ya GPS map nunga inoksema mali aser iba jagi atutsü lenmangji gari ka dang senzütettsüsa lir.
IS pusemer Harun Mehicevic-ia iba tesem nung ali hectare ana alia lir, ta kasa osangkaket ajanga ashi.
Mehicevic ya Balkan rara mapang Bosnia nungi 1990 meta jena oa Melbourne nung alitsü tenzük aser iba yimti nung tang ya pa nisung ajaki lendong keta aliba nisung ta tetshir.
Jihad atema rarartem ozüng alema Syria nungi Greece-i arudang Turkey, Macedonia aser Serbia linüktem ajanga arur aser Bosnia ya parnok asoshi tesem tajung ka lir.