Naga nungeri sorkar mapa dang inyaknüba tangatetba melentsüla

Kohima, January 3 (TYO) : Naga nungeri sorkar mapa dang inyaktsü jangraba tangatetba melenshitsüla kechiyong government sector nung mapa mali kümogo, ta School Education & SCERT Minister, Yitachu-i ashi.
Tseminyu sub-division kübok Kandi Students’ Union (KSU) hon jubilee sentong nung o jembidang Yitachu-i ashiba agi, Naga nunger yim tulu aser tila ajak nung shisaliok tsütsü kanga inlokogo aser mapa bushirtem aikati sorkar mapa inyaktsü dang jangrar.
“Kaketshirtem, tsüraburtem, tantsü-tambutem aser lennirtem aikati sorkar mapa dang inyaktsüba tangatetba lir aser iba ya ajanga Naga nunger lokti nung timtem adokogo. Asenoki iba tangatetba melenshitsüla. Joko sorkar mapa nüngdakba periogo aser talila anioktsü makoker” ta paisa metetdaktsü.
Sorkar mapa timtiba aliba department ji School Education department lir aser iba department nung Minister ka ama joko mapa atema dangbo nisung manioktsü merangtsü, ta Yitachu-isa ashi.
“School temji mapa angudak atema masü mesüra nisung kar idakji mapa inyaktsü atema lapokba masü saka asen tanurtem shisaliok angudak südaktsünür. School temji shisaliok dak sendakba mapa inyakdak asütsüla aser tanga department aser agency nem mapa agütsütsü indang mapa inyakdakjang” ta Yitachu-isa ayongzük.
Mapa angutsü atema yimtsüng aika nung school tem lapokba ajitetogo. Ajisüaka iba tangatetbaji tai lir. Asen tanur nem shisaliok agütsütsü atema asenoki school tem lapoktsüla. Sorkar mapa inyaktsü atema mapaji education department nung masü saka tanga department nung inyakdi, ta paisa shisem.
Kaketshir teloktemi asen lokti nung temelenshi aika bener arutsü tashi lir, anungji kaketshir teloktemi entrepreneurship aser industrialization atema telemtetba takang agitsü nüngdak, ta paisa ayongzük.
“Sorkari industries ajungkettsü atema senotsü rizüngtsüla aser asenoki iba amaji inyakang ta akhangtsüla. Iba asoshi asenoki temulung agütsütsüla kechiyong industries ajanga nisung lakh aika mapa angutsü” ta Yitachu-isa ashi.