India-i Pak den Foreign Secy-level senden thinena atatsü akok

New Delhi, January 04 (Agencies): January 15, 2016 nü Pakistan yimtiba Islamabad nung par linük den foreign secretary level ken o jembitsü sentong alibaji Narendra Modi’er sorkari thinena atatsüa akok, ta osang ka ajanga ashi.
Tawa Panthankot air base amaktsü meranger kiralongrartemji arrsang ola magütsüdangyongi air base campus telungi aiter südi ta bilemer.
Osang ajanga ashiba agi, arrsang ola agütsüba sülen idangyongjisa Punjab nung Pathankot air base densema tongtibang tesemtem ajak nung security akhanga liasü, koba ajanga kiralongrartemi tebilemba ama junga memakteti liasü.
“Kiralongrartemji January 1 anepdang air base telungi ait südi ta onoki melung melemi bilemer, iba sülen ghonda ishika lir sülen ang nikongdang arrsang olaji agütsü,” ta parnoki ashi.
Punjab Police SP Salwinder Singh-i, kiralongrartemi pa den nisung ana pua lir ta osang agütsüba osangji jangjashiba mapang ghonda ishikabo lalu, ta osang ajanga ashi.
Osang ajangasa ashiba agi, SP Singh-i kiralongrartem osang metetdaktsüba police ketdangsertem jagi tamasabo iba osangji süoki ia magi, ibaji ajanga kanga tongtibang mapang karbo lalu.
Security agency temi ashiba agi, kiralongrar ajak agi parnok trok liasü aser parnok telok ana lemsar, telok ka nung nisung pezü aser telok ka nung nisung ana liasü.
Osang ajangasa ashiba agi, Pathankot amaker kiralongrartemji Mumbai 26/11 amakertem dang nungi training tajungba agia alirtem liasü.
Kiralongrartem inyakyimji ajanga, kanga mongin army-i parnok nem tesayuba agütsü ta tejangja meteter, ta parnoki ashi.
Kiralongrartemi mongin rarartem ama sepaitem yakyaka maliba mapang, anepdang 3:00 ako nung amak aser tamakertem ajunga süogo ta sayutsü atema ola madoki liasü. Aser item ajakji mongin mitkartem inyakyim lir, ta kasa osang ajanga ashi.
Kiralogrartem jagi International arrtsü nungi kilometer 5 pila oor Gulpur-Samboli anasa Toyota Innova gari anir, Ikadar Singh apu, aser parnok ya yangji aliba arrtsü ajanga ait südi ta melung melemi bilemer. Tesülen kiralongrartemi gari anisangji tepseta liasü.