Taoba Commonwealth Champion, Fateh Pathankot lendong nung süogo

New Delhi, January 04 (Agencies): Kiralongrartemi tawa Punjab kübok Pathankot Air Base nung atalokdaktsüba lendong nung taoba International rifle toktepa kashishir, Subehdar Major (Retd) Fateh Singh asüba osang jangjaogo.
“Dogra regiment kübok Defence Security Core (DSC) nung züngsemsang, arishi küm 51 tain Fateh-i India linük asoshi pa taküm bendanga agütsüogo. Pa ama walunir ka asüba atema kanga sasar,” ta National Rifle Association of India (NRAI) Tir, Raninder Singh-i temulung shiranga ashi.
Asür Fateh Big Bore prangpong kashishir mongin ka liasü aser New Delhi nung 1995 küm ayongba 1 buba Commonwealth Shooting Championship nung pai gold aser silver medal agizük.
“Küti Fateh chijiba mitkar ka ama iba lima nungi pilaogo. Pa nüngtem nung ozü Jhanda Gujjran yimdak nüngshilong ka metongtsü,” ta Fateh tenu, Surjit Singh-ia metetdaktsüogo.
Asür Fateh-i kinüngtsü aser jala 2 toktsür iba lima nungi pilaogo.