Mizoram-i HPC(D) telok den yimjung olemtep malitsü

Aizawl, January 5 (Agencies) : Manipur nung amenoka aliba Hmar People’s Convention (Democrats)-i olemtep alitsü mulungaka Mizoram sorkari parnok den yimjung olemtep malitsü, ta Home Minister R Lalzirliana-i metetdaktsü.
HPC(D) nung ‘Chairman’ H Zosangbera-i anir par teloki yaküm State sorkar den yimjung yanglutsü atema asüngdang saka ibaji magizük, ta Lalzirliana-i ashi.
“Telungpurtemi onoki ashiba ama meinyakra 2016 küm parnok den olemtep alitsü tebilemba kecha mali” ta paisa shisem.
Hmar telungpur teloki rakzükba prangpong-injang ajak meyipa magütsü tashi sorkar parnok den olemtep metenzüktsü, ta Lalzirliana-isa metetdaktsü.
Yaküm küm tetenzüklen iba telok yagi Assembly Committee on Government Assurances telok ka amak.
Yaküm March 28 nü Mizoram-Manipur arrtsü anasa HPC(D) telungpurtemi Assembly Committee amakdang police asem kahset.