China: Nisung kati bus gari nung mi senoktsü, 17 rongset

China kübok Ningxi Hui Autonomous Region yimtiba, Yinchuan nung firefighter ketdangsertemi mi agi rongsaba bus gari telung nung mapa inyakba noksa nung angur. (Yinchuan, January 05)

Beijing, January 05 (Agencies): China nunger kati bus gari ka nung mi senokja lendong atalokdaktsüba osang ka China sorkar ketdangsertemi tanü Mongolbar nü metetdaktsüogo.
Senotsü den sentakba mangatettep ken o adokba sülen arishi küm 33 tain Ma Yongping-i bus gari nungji mi senoktsüba osang jangjaogo ta police-i metetdaktsü.
“Tanü atalokba mi lendong nung nisung 17 rongsetba aser nisung 32 shi yiruba osang tang tashi nung jangjaogo,” ta parnoki ashi.
Lendongji ataloker ghonda ishika süir külen police-i Yongping Ningxi region yimtiba, Yinchuan nung atsüka lia apuba osang ka regional sorkar office ajanga metetdaktsüogo.
Contractor ka den senotsü den sentakba mangatettep ken o adoka jashiba yong Yongping-i totzü pungdang ana bener bus gari nung amen aser tesülen totzü nung mi senoktsür jena aoba osang jangjaogo ta parnoki shisem.
Firefighter ketdangsertemi miji minute 5 shi nung remsep aser tang yirua alir rong nung nisung 8 taküm tia kanga mejungi lir.
Taoba mapang, 2013 nunga China southeast tsütsülen Xiamen yimti nung senzüba bus gari ka nung mi senoktsüba ajanga bus-i anir alir nisung 47 tashi rongsetba osang bushiteta lir.
Yaküm, 2015 küma arishi küm 35 tain nisung kati Hangzhou yimti nung jajaba bus gari ka nung mi senokja lendong atalokdaktsüba ajanga nisung 33 tashi yirua liasü.