Germany nung migrant nisung million 1.1 tashi 2015 küm jenok

Berlin, January 06 (Agencies): Pei linük toktsür bendanglen jenoker migrant nisung million 1.1 shi Germany nung yaküm, 2015 küm jenokba osang ka Germany sorkari tanü Bodbar nü metetdaktsüogo.
Par linük jenoker rong nung Syria lendong toktsür migrant nisung 428,468 shi densemba osang jangjaogo ta parnoki ashi.
Syria nunger migrant nisungtem sülen anidaka, Afghanistan nunger migrant nisung 154,046 aser Iraq nunger migrant nisung 121,662 tashi Germany nung jenoka Germany nung jenoker migrant nisungtem timba tarensen nung tanabuba aser tasembuba jenjang ajangzükba osang bushitet.
Yaküm par linük migrant nisungtem jenokbaji taoba mapang, 2014 küm migrant nisungtem jenokba den pungoben agi timba aliba osanga bushitetogo.
Ano külen, tila tanur ishika densema, migrant nisung 36 indang tasümang Turkey tzüyimkümlen anguba osang ka bushitetogo.
Kasa tesem nung resuce ketdangsertemi migrant nisung 12 tashi taküm kümzüka aniteta liasü.
Ano külen, bomb talep asütsü akok ta temulung melemi bilemba oset ka office tongtsüba sülen German Chancellor, Angela Merkel’er office nung tanü makmakshimak adokba osang jangjaogo.
Ajisüaka, bomb mongitemi iba talepji tendangba sülen talep nung bomb densema maliba osang jangjaogo.
Kiralongrartemi France yimtiba, Paris nung nisung 130 tashi tepseta yaküm lendong tesashi atalokdaktsüba sülen Europe ajungai tang kümdangshia lir.