Airtel-i 4G handset Rs 4,000 jenjang sayatsü

New Delhi, July 19 (Agencies): Sen dalang yong Reliance Jio indang 4G service handset den tokteptsü asoshi taküm October-November ita tashi nungi Bharti Airtel-i sen 4,000 jenjang Airtel branded smartphones sayatsü sentong lir, ta osang ka ajanga ashi.
“Sen 4,000-12,000 jenjang dual mode 4G handset sayatsü asoshi Airtel-i bilemdagi. Iba ya Airtel branded handset dang asütsü asü co-branded handsets asütsü’ar iba asoshiji jembitepdagi,” ta industry osang ka ajanga ashi.
Company-i Chinese vendors den jembidagi aser Taiwan nung amenoka aliba Foxconn den-a jembidagi.
Ajisüaka Airtel aser Foxconn nungibo osang balakabo sangdonga mali.
RIL Chairman Mukesh Ambani-i company indang general meeting nung, Reliance Jio Infocomm maparen ajanga linük nung sen 4000 dak tajemba agi 4G mobile phone angutsü ta metetdakja liasü.
Iba ya Mukesh Ambani-i tang agi tanabenbuba telecom nung ajemoker lir. 2003 küm Reliance-i sen 500 jenjang mobile phones saya-a liasü, aser ibaji ajanga talirtem aika aküm.
Osang ajanga ashiba agi, “Iba yagi FDD aser TDD LTE network-a support asütsü. Iba ya locked handset ka masütsü. Item handsets ji taruba Diwali benjung mapang sayatsü imlar, October mesüra November nung sayatsü,” ta ashi.
Airtel-i mapang telemsa yur linük nung 4G service tenzükdagi.
Küm asem tejaklen parnoki India nung mezüng 4G service Kolkata yimti nung tenzükja liasü. Parnokisa Nagpur, Aurangabad, Bengaluru, Pune, Chandigarh aser Patiala densema yimti aika nung 4G service tenzüktsüogo.
Iba dak alia Delhi, Hyderabad, Vizag, Madurai, Chennai, Coimbatore aser Mumbai nung Airtel amshirtem asoshia 4G tendanga tenzükogo.