Germany-i Havana nung shishilembatsü office tentettsü nangzüker

Havana, January 08 (Agencies): Cuba kübok Havana nung shishilembatsü office ka tentettsü tezüngzüktep ka Germany o Cuba nati yashi Brehostibar nü agiogo.
Par linük ana tsüngda küm shi euro sen million 225 jenjang shishilembateptsü nangzüktepba mapa küma inyaktsü aser Germany nung tentetba shishilembatsü tentettemi Cuba nung par shishilembatsüren sadema inyakdaktsütsü nükjidong nung Germany o Cuba nati shishilembatsü office tentettsü tezüngzüktep ya agir lir.
Germany Vice Chancellor & Economy Minister, Sigmar Gabriel-i Cuba semdanga Cuba Foreign Trade Minister, Rodrigo Malmierca den tan tezüngzüktepji zülutepa agi.
Tarutsü mapang nung German-Cuba na shishilembabaren jenjang tang dang nungi pezüsü agi timba küma par linük anati euro sen billion 1 shi jenjang shishilembatsü akok ta Germany nunger shishilembar mongintemia metetdaktsüogo.
Cuba-i United States den tesendaktep tajungba küma yangluba ajanga par linüki tanüngba alima linüktem den shishilembabaren taoba mapang nungi tesademba inyaktettsü ta parnokisa ashi.
“Ozü linüki Cuba den yimtenren aser rongsenren tesendaktep tajung yanglutsü alizüng yua lir,” ta Gabriel-ia metetdaktsü.
Gabriel-i tan Cuba semdangdang Cuba Tatong Tir, Miguel Diaz-Canel aser Cuba Cabinet minister-tem dena ajurutepba osang jangjaogo.
Spain, Netherlands aser Italy nunger sülen anidaka, Germany ya Cuba linük den tongtipangsüa shishilembatepba Europe linük rong nung 10 buba linük lir.