Bihar nung tetsür ana train nungi nungzüka yok, ka asü

Patna, January 8 (Agencies): West Champaran district, Bihar nung kanga dang tesüngmangtsü tatalokba ka nung memetetba nisung kari train tudak nung tetsür ana nungzüka yokba mapang ka asü aser ka kanga mejungi yirur lir, ta police-i Hokolbarnü metetdaktsü.
“West Champaran nung aliba Bettiah railway station anasa tetsür ana train nungi kangshia nungzüka yok,” ta yangji aliba police ketdangser kati ashi.
Tetsür ana ya Uttar Pradesh nungi Mamata Mishra aser Shweta Verma ta jangjaogo.
Tena ya Narkatiyaganj-Hajipur, Intercity Express nung tudak nung iba lendong atalok.
Verma bo yangji atanga asü aser Mishra-a tasü taküm tsüngda sorkar mozü ki ka nung kangshidar, ta police-i ashi.
Iba tatalokba dak sendakba nung ken o ka benokogo aser iba nisung tepsetba mapa inyakertem aputsü asoshi bushisüngdang maparen tenzükogo,” ta police-isa ashi.