Sorkar mapa dang masü tanga mapatem inyaktsüla: Apok Jamir

Waromung (Mokokchung), January 8 (TYO) : Lanurtemi educational degree anguba nung dang temulung sür malitsüla kechiyong kanga dang kara ainba alima nung nisung ka kechisarena ajaklen renloktsübaji kanga tongtipang, ta Tourism Parliamentary Secretary, C Apok Jamir-i tanü ashi.
Waromung nung Changkikong Kaketshir Mungdang 51 buba Lokti Senden tatembangba anogo nung tetushi süa jaoker Apok Jamir-i iba tayongzükba agütsü.
Tangari asen dak ajitetba yimyayimpongji kanga tongtipang. Lanurtemi taküm nung pei taginüba aser tejangrabatem kanga junga angatettsüla aser alizüng atongtsüsa meranga inyaktsüla, ta pai ashi.
Nisung ajaki sorkar mapa mangutsü, anungji lanurtemi pei inyakba mapa nung takotet akümtsü atema kanga merangtsüla. Asenoki sorkar mapa inyaktsü atema dang mebilemtsüla saka tanga mapatem meranga inyaktsüla, ta C Apok-isa kaketshirtem ayongzük.
CKM 51 buba Lokti Senden tembangba sentong nung DAN, NBRM Chairman, Dr Longri-i Changkikong tsükong nung gari lenmang tia indang jembi.
Pai ashiba agi, Chief Minister, T R Zeliang-ia Changkikong nung gari lenmang mejungi aliba atema khuret süa bilemtsür aser lenmang yanglutsü atema mapa tenzükogo.
Naga nunger loktiliba nung human development, economic development aser social development nung temelenshi nüngdak. Asen lokti nung meranga inyakertem asoshi mapa inyakdak peria lir. Mapa inyaktsü jangrartem asoshi mapa lir. Anungji lanurtemi sorkar mapa dak dang teimla meyui tanga mapatem meranga inyaktsüla, ta Dr Longri-isa ashi.
Iba sentong nung mungdang choir aser ‘Samaro’ teloktemi ken ajanga shilem tajung agia liasü.
Mungdang tembangba sentong nung tetushi süa jaoker Dr Longri-i folk song competition nung takok angur nem sempet lema agütsü. Iba tetoktepba nung Khar Students’ Union-i mezüngbuba jenjang, Luyong Students’ Union-i tanabuba aser Waromung Students’ Union-i tasembuba jenjang takok angu.
CKM 51 buba lokti senden nung best exhibition stall sempet balaka shimteta agütsü aser ibaji Luyong Students’ Union-i angu. Iba sempet asoshi tetendangertemji Education Minister, Yitachu aser Parliamentary Secretary C Apok Jamir na liasü.