Manila nung Zumba class Guinness World record yanglutetogo

Mandaluyong city (Manila) July 19 (Agencies): Tesem ka nung Zumba class tulutiba ayongzüka Philippines yimtiba Manila nung nisung merirjang aikati shilem agiba ajanga parnoki iba Guinness World record tasen yanglutetogo.
Mandaluyong gari lenmang nung minute 30 tashi shilem agia tsüngsangertemji nisung 13,000 jungnüa liasü ta Guinness World Record ketdangsertemi züngdangtetogo.
“Zumba class tulutiba ajanga tang aliba record 8,232 madak takok ngua otsü tasen ka yanglutetogo. Ni nenok dang tanü iba ya ashir, Mandaluyong yimti nung nisung 12, 975 liasü, iba tetezü Guinness World record tasen yanglurji parnok lir,” ta Guinness adjudicator, Alan Pixley-i sangdongogo.
“Iba ya onok asoshi tepelatsü osang ana lir. Onok ket nung United Nations Award ka lir aser temang anema alibaren nung tang onoki Guinness World Record ka nguogo,” ta Mandaluyong City Mayor, Benhur Abalos-i ashi.
Temang anema alitsü sayaba Zumba ya 1990s mapang nung Colombia nunger tsüngsanger kati purapiteta liasü. Zumba saya nung ya aerobic exercise agiba den külemi tsüngsanger.