Patanjali noodles-i kobi meli Maggi ajangtettsü: Ramdev

Mumbai, January 09 (Agencies): India nung tentetba Patanjali shishilembatsü teloki atta agi yangluba noodle-i tarutsü küm ishika tsüngda nung Maggi telok ajangteta India nung noodle yanglur telok tulutiba akümtsü ta Patanjali kibur aser yoga guru, Ramdev-i tanü Honibar nü sangoktsüogo.
“Patanjali atta noodles-i kobi meli Maggi noodles ajangteta India ajunga nung noodles yanglur telok tuluba akümtsü. India nung tentetba Fast Moving Consumer Goods (FMCG) kübok densemba Patanjali teloki tang atta noodles ton 100 yanglur saka kasaji ton 500 tashi küma timba yanglutsü alizüng yua lir,” ta pai ashi.
“Multi National Companies (MNCs)-i India sen ajunga bendangleni bener oadoker,” ta shia, tarutsü küm ishika tsüngda nung Patanjali teloki Hindustan Unilever Limted (HUL) telok dak alaka, tanüngba MNCs ajunga ajangtettsü alizüng ayuba olen ka pai shisem.
Paisa ashiba agi, Patanjali teloki osettsüset jenjang tajemba agi ayokba ajanga Patanjali teloki shishilembatsü sabang tuluba amokbanga aotsü tenzükogo.
“Patanjali teloki taruba küm 5-7 tashi nung sen crore 5000-10,000 tashi tajangzük angutsü alizüng yua lir aser iba tajangzük noklang nung noklang shilem nübur yaritsü maparen nung amshitsü,” ta Ramdev-i sangoktsü.
Acharyakulam ta ajaba tesüiba Vedas aser tanü putu na temeyoktep tesayuba naprongla agütsüba kaketrejutem India ajunga nung asensa tentettsü alizüng ayuba osang ka Ramdev-isa metetdaktsüogo.