2015 küm Kohima District police dangi ken o 352 benok

Dimapur, January 9 (TYO) : 2015 January nungi December tsüngda Kohima District Executive Force den ken o 352 benoka liasü aser ken o 161 ji nisungtemi benokba aser 191 ji District police-i benokba liasü, ta Joseph Hesso, NPS, Sr. Superintendent of Police, Kohima-i sangdong ka nung metetdaktsü.
Ken o 352 rongnung Chargesheet- 290, Final Report- 31 aser Pending Investigation – 31 lir, ta paisa ashi.
2015 küm tanur 6 tashi ken o balala nung aija apu aser tetsür den sendakba ken o benokba 50 nungi 24 ji tetsür anema inyakba aser 26 ji tetsürtemi ozüng anema inyakbatem liasü. Nisung ajak agi 499 apu aser parnok rongnung tebur 466 aser tetsür 33 liasü.
2015 küm ILP malir nisung 252 tashi apu aser parnok ajak BEFR Act kübok arrla 3 & 4 nung aitsü.
“Onok dak tashi mait aser metokperi liaka nübortemi onok pusema nungitba aser yaritepa atema kanga pelar. Onoki onok tajungtiba agi taküm küma nübortem aser rongsen lendong nungi kümzüka ayutsü atema inyaktsü nangzüker, anungji maneni nübortemi onok den yariteptsü mepishir,” ta Joseph Hesso-isa sangdong nung shia lir.
District Police-i puteta benokba ken o 191 rongnungi tongtipang ken o 6 tsünglanglen agütsür,
1.     Sen crore 2.79 shi alangba auyba gari 56 ngutetba (tanga state tem nung samaba gari 25 densema.)
2.     Sen crore 3 shi alangba ganja seret 6708 aser sen 27,000 Opium gram 900 ngutetba.
3.     Sen lakh 75 shi alang IMFL bottle 36,847 ngutetba.
4.     Sen lakh 57 shi alangba Ginseng seret 1900 ngutetba.
5.     Sen lakh 25,70,300 shi alangba ozüngi noktanga aliba aket mozü aser ozüng alema shibelenba mozütem apuba.
6.     Sen lakh 12,03,758 alangba Pangolin scales apuba.