Kosovo nüburtemi sorkar anema longkak aiter

Pristina, January 10 (Agencies): Kosovo nübur meyirijang aikati sorkar anema kanga sashia yashi, Honibar nü longkak aitba osang ka sorkar ketdangsertemi metetdaktsüogo.
Kosovo linüki tan ajurushiba longkak aittsü timtem ya par linüki Serbia yimli nungi nüchiso 2008 küm ngur tanü tashi nung timtem tulutiba ajurur lir.
‘Kosovo sorkar jirepjang’ ta ola tulu adoka ayimtenba longkak aitertemi yashi Pristina yimtiba nung longkak kanga sashia aita par yimsüsürtem aitsüba den külemi, sorkar tesepti rongdoktsütsü meranga liasü.
European Union (EU)-i ayonger külen Albania nüburtem longsoa aliba tesemtem nung Serbia nübur timba densemba municipal-tem tenteta yimsüsütsü tashi tuluba agütsütsü asoshi Kosovo sorkari Serbia den tezüngzüktep agiba atema jashia yashi longkak aitsü sentongji agiba osang jangjaogo.
Ano, kidangsüa aliba aser Kosovo lushi tila ka agüja aliba Mongtenegro linük den arrtsü balaka latetba maparena yashi longkak aitertemi anema liasü.
“Tan Serbia aser Montenegro linük na den agiba tezüngzükteptemji Kosovo’er peisasa pei madak yimsüsü asütsü temeten aser linük temzüng anema inyaker lir,” ta Kosovo parliament ki anasa ayongba longkak aitsü sentong nung opposition telok lenirtemi metetdakja Kosovo-i election agishia sorkar tasen tentettsü takhangba benok.
Yashi sentong nung onük jembibaren atemba jakdang longkak aiter parnok meketa alir police ketdangsertem dak long aser pokshitsü osettsüset onlokja amaktsü tenzükba sülen longkak aiter o police na tsüngda rara tulu adokba osanga jangjaogo.
“Onoki kanga dang aremzüka atasadang saka longkak aitertemi sorkar kidang mi senoktsütsü tenzükba yong ozü ketdangsertemi parnok songtemsüsa aküm,” ta Kosovo police ketdangser, Major Baki Kelani-i tesülen metetdaktsü.
Police-i tenük mesepdaktsüba mozü kalokja longkak aiter nisung 8000 shiji senshidaktsütsü merang saka longkak aiter aikati police kedangsertem dak long aser Molotov cocktail ta ajaba pokshitsü oset onlokja police den raraba osang jangjaogo.
Yashi atalokba lendong nung police kedangser 10, longkak aiter 2 aser osangbener 2 densema ajak agi nisung 14 tashi yirua liasü.
Police-ia yashi nikongtsütsü tashi nung longkak aiter nisung 24 tashi pua ayutsüsa akümba osanga jangjaogo.
Taoba ita ishika tejaklen nungi tenzüka, oppostion telok densema, nüburtemi Kosovo yimsüsürtem dak temulung melemteti küma par linük tensa mejungi akümba osang bushiteta lir.