Iran-i Middle East tensa mejungi kümdaktsür: Saudi Arabia

Riyadh, January 10 (Agencies): Iran linüki Arab linüktem den sentakba ken o nung teka amoker aser Middle East tesem nung tensa mejungi kümdaktsür ta shia, Saudi Arabia Foreign Minister, Adel Al Jubeir-i tanü Deobar nü Iran aitsüogo.
Iran aser Saudi na tsüngda tesendaktep mejungi akümba ajanga Middle East nung tensa mejungi akümtsü tenzükbaren tajungba kümdaktsütsü nükjidong nung Riyadh nung ayongba rongdak Arab League senden nung shilem agia, Jubeir-i iba aitsüba olenji tanü metetdaktsü.
Saudi sorkari Shiite nunger putir, Nimr al-Nimr tan January ita 2 nü tepseta merenshi aser iba maparen anemer ta sayua Iran nüburtemi Tehran nung tentetba Saudi embassy ki amak.
Iba sülen Sunni nunger longsoa aliba Saudi yimli aser Shiite nisungtem jenti alidak, Iran na tsüngda tesendaktep mejungi akümtsü tenzük.
Par linük ana tsüngda tesendaktep mejungi akümba ajanga Middle East ajunga nung tang tensa mejungi akümtsü tenzüka lir.
“Iran-i Saudi embassy ki amakba ajanga par linüki kin o kin na tsüngda mangatettep adokja tensa mejungi kümdaktsütsü merangba kuli tejangja angur,” ta Jubeir-i shisem.
Ano külen, Saudi sorkari pu agi Saudi nunger ka lensetba ken o nung aitsüba sülen Ethiopia tsür ka tanü tepseta merenshiogo.
Tanü tsürla tepseta merenshibaji Saudi sorkari taküm 2016 küm tenzüker tanü tashi nung aibelener nisung 50 buba nem tasüba temerenshi agütsür lir ta Saudi Interior Ministry-i metetdaktsü.
“Saudi nunger Ghalia Eida al-Harithi pu agi lensetba ken o nung aitsüba sülen Ethiopia tsürla, Jinat Farid tanü Taif yimti nung tespeta merenshi,” ta ministry-i osang jangjashitsü.
Ministry-isa ashiba agi, Farid-i Harithi tepsetba sülen hon agi yangluba anguti 2 aser sen ishika auyaba kulia bushitet.
Ajisüaka, tanü merenshila aser lai tepsetba nisungba na tsüngda kechi tesendaktep liasü iba osangbo ministry-i memetetdaktsü.