J&K nung memunoi police battalion tasen 17 lapoktsü

New Delhi, July 19 (Agencies): Centre teyari ajanga Jammu & Kashmir aser Maoist temi lendong agütsüba state tem nung memunoi police battalion tasen ter ser tenet lapoktsü koba nung police ajak agi 18,700 alitsü.
Police battalion ter ser tenet lapoktsüba ya Home Ministry-i mepishiba ajanga lir. Item battalion ter ser tenet rongnungi Jammu & Kashmir nung pongu lapoktsü aser tanüngba teranaji Maoist teloki lendong agütsüba state nung lapoktsü, ta Home Ministry nung tongti ketdangser  kati ashi.
Battalion shia nung nisung 1,100 alitsü.
Item battalion asoshi state nung aliba lanur dang agitsü aser Maoist teloki lendong agütsüba tamajungtiba district  27 nungjibo noklang nung shilem 75 tashi lanurtem dang agitsü.
Jammu & Kashmir nungbo sepai asaba mapang telungpur tali aliba tesem takzer shimtsü.
Battalion shia nung sen crore 61 shi nüngdaktsü aser iba nungji Centre-i noklang nung shilem 75 agütsütsü.
“Iba ya paramilitary battalion ka dak indokba den khenyongi tajemba lir. Paramilitary battalion ka dak sen crore 160 shi indoker,” ta ketdangser jagisa ashi.
India Reserve Battalion (IRB) tem ya tang-tangbo pei state nung yuja lir saka nüngdakba mapangbo tanga state tem-ia yoker.
Tang tashi nung state ajak senteper IR battalion 144 lir aser iba den külemi ano Andhra Pradesh o Telangana state na nung IR battalion pezü-zü lapoksema ajak agi battalion ti lapoktsü asoshi centre-i tawa ang temelaba agütsüogo.