Nisungtem tangatetba ajak agizüktsüla: Mohan Bhagwat

Bengaluru (Karnataka), January 11 (Agencies): Linük nung tamangba lokti balala nüburtem tsüngda akhümtsübutep maliba anema sentong balala ayonga akaba mapang ka nung Deobar nü RSS tongti, Mohan Bhagwat-i, tentet (RSS) omen, ‘pei atema mebilemi linük tenzükba’ ajanga India ya tashi tulu aliba linük ka akümtsü asoshi nisung ajaki tamangba yimsü balala aser nüburtem tangatetba balala agizüktsüla, ta ashi.

“Hindu sobaliba ajanga ajak agizükteter. Onoki telemsa balala ajak longjema alitsü atema noktaker. Asen sobaliba ajanga ashiba agi, asenoki ajak agizüktettsüla, sobaliba ajak agizüktettsüla,” ta Deobar nü Bengaluru nung Akhila Bharathiya Shrung Vadya Shibir sentong nung jembidang Mohan-i ashi.

RSS tongti-isa, “Kobi melii asenok ya alima nung tanobutiba linük ka akümtsü. Anungji India nüngtugu akümtsü atema asenoki lanurtem nem tesayuba balala agüja parnok renlokdaktsütsüla,” ta ashi.

Narendra Modi’er sorkari ‘Make in India’ mapatong benokba tenüngsanga pai, “Tatemsabo iba ya ajanga Made in India nükjidong ataloktsü ni imlar. Lenirtem aser sorkar kijai India tashi meitdaktsütet, iba asoshi khuret abenba sensotem nüngdaktsü. O kija jembiba aser o atsütepba ajanga iba nükjidong matongtsü. Asenoki iba ya tamentaktak nungi sayutsüla,” ta ashi.