Nagaland nung Human Rights Commission alitsü

Kohima, Jan.11 (TYO) : Nagaland nung State Human Rights Commission tentettsü asoshi Home department ajanga Nagaland sorkari metetdaktsüogo.
Iba Nagaland State Human Rights Commission nung tekolakji High Court nung Chief Justice inyakdangba nisung asütsü aser züngsemtem rongnung kabo High court nung obendanger inyakdangba nisung asütsü aser ano Human Rights maparen metetba aser ajangshidangba nisung ka züngsem asütsü. Iba Commission nung Tezülur ka alitsü aser paji Joint Secretary jenjang nung Chief Executive Officer asütsü.
State Human Rights Commission nung mendenbuba aser züngsemtem ajakji Chief Minister den Speaker, Home Minister aser Opposition lenirtemi akümba Committee kati shimtsü.
Iba Commission nung mendenbuba aser züngsemtem nem ita sen, teyari aser parnok teinyaktsütem maparen ajak state sorkari latettsütsü.
Iba Commisison nung bushisüngdangertem (Investigating Wing)-ji Superintendent of Police, 1 (One) kati anir Inspector 3, Sub-Inspectors 6, Constables 3, Drivers 3 aser Peon 3 alitsü. Item ketdangser aser tenzükertemji Director General of Police, Nagaland-i yoktsü.
Iba Commission-i küm shia mesüra special report tatar senden nung benoka jembitsü asoshi state sorkar nem agütsütsü. Iba osang nungji teinyaktetbatem mesüra inyaktsübatem aser inyaktsü nungloktsüba kar meinyakteti lira kuli agütsütsü.