China nung tongti ketdangser ka küm 15 tepuokdak ayutsü

Beijing, January 12 (Agencies) : China-i taoba vice public security minister Li Dongsheng küm 15 atema tepuokdak ayutsü temerenshi agütsüogo, ta Mongulbarnü sorkar osang ka ajanga metetdaktsü.

Dongsheng ya security ketdangser Zhou Yongkang den külemi ochimashi inyakba ken o tem nung aija liasü.

China nung Tir Xi Jinping-i ketdang asütsü tenzükba sülen küm asem tsüngda Communist Party, sorkar, mitkar aser sorkar meyong company tulutem nung tongti ketdangser aika ochimashiba ken o tem nung aija tepuokdak yuogo.

Yaküm October ita Tianjin nung okadak ka nung Dongsheng indang ken o angadanga liasü. Pai ozüng alema 22 million yuan ($3.5 million) shi alangba rongsen agiba atema aitsü, ta iba mapang Xinhua news agency ajanga metetdakja liasü.

Dongsheng ya Ministry of Public Security nung tongti ketdangser ka liasü. Ketdangsertemi pa indang rongsen nungi 1 million yuan shi alangba agiogo, ta China Central Television (CCTV)-i osang metetdaktsü.

1996 küm nungi tenzüka pai mapa balala inyaka arudang ochimeshii inyak, ta Xinhua-i sangdong ka nung metetdaktsü.

Communist Party nung ochimashi ketdangsertem aliba ajanga tarutsü nung party-i sorkar yimsü asütsüsa tashi mangutsü akok, ta China Tir Xi-i kuli agütsür saka ano asameyangertemi ashiba agi, iba inyakyim ya Xi-i pa den toktepertem agienba lir.