Kolkata sentong ajanga temulung pelar

January 12, 2016: Mumbai nung atiba sülen Pakistan nunger nüngtugu kentener Ghulam Ali-i Mongulbarnü India anüdoklen tsütsü kenten sentong agittsü melaba atema pelaba metetdaktsüogo.
“Ni tanü kanga pelar. Ni küm 35 ashi Kolkata teti semdanger. Ajisüaka tanbo ni küm 50 shi lir arua semdanger amai bilemer. Ni temulung nung kanga mepelateti liasü ajisüaka kü tejashi ajak remogo,” ta Netaji Indoor Stadium nung Ghulam Ali-i kenten sentong tenzükba mapang metetdaktsü.
Par jabaso tenati adenba ken ka ajanga West Bengal Chief Minister Mamata Banerjee ji Hindu amangertem indang ken aser shisatsü tsüngrem, Sarawati mesük lir, ta tushi tenlokja liasü.
“Ni la dang kangasa pelar. Lai Sarawati amai onok asoshi teyari tulu agütsüogo,” ta Ghulam Ali-i menürema ashi.
Iba ya masüdang pai Kolkata nung 1981 küm tesüsa ken tena liasü.
Banerjee-i shinga mebendangi amshitsü nükjidong nung, arishi küm 75 tain, kentener dang ano yasüra arua iba ama sentong agitsü shiogo. La pa nem sü tabentsü ka den scarf agüja pela agüzüka liasü.
“Ni ken metenteter. Ni kenji tangatsü dang shia lir,” ta ashidang pai, Bade Ghulam Ali aser par adianu asemi pa mezüngmeshiba bilemteta ashi.
“Ni parnok sülen ken atenba angazüktsü asoshi anidaka liasü,” ta “Chupke Chupke Raat Din”, “Kal Chaudhvin Ki Raat Thi”, “Hungama Hai Kyon Barpa”, “Kiya Hai aser Pyar Jise” ken atensangi Ali-i ashi.