State BJP-i Tir tasen pela agizük

Dimapur, January 12 (TYO) : Mongulbarnü State BJP-i State President tasen shimba Visasolie Lhoungnu pela agizükba sentong ka ayongzüka agi.
Iba sentong ya party office, Dimapur nung liasü aser linük jenjang nung lennirtem, state party ketdangsertem, state frontals aser party meimertem aden.
Sentong nung National Secretary in charge of Nagaland state, Farrooq Khan-i Nagaland nung Tir tasen Visasolie nem tenüngsang agütsü aser paisa party indang alizüngtem metetdaktsü.
State tir Visasolie lenisüba kübok party züngsemtemi terenlok mapa inyakba ajanga Nagaland nung temelenshi bener arutsü atema inyakang, ta Farrooq Khan-isa züngsemtem ayongzüka jembi.
Taoba Nagaland state BJP Tir Dr. M.Chuba Ao-ia pa melenzüksang nem tenüngsang agütsü aser pai ketdangsüa arudang pa den yaritepba züngsem ajak dang pelaba metetdaktsü.
Dr. M.Chuba-isa züngsemtem dang Nagaland nung party tashi taitba kümdaktsütsü atema inyaktsü tayongzükba agütsü.
Ano, Prashant Arora, General Secretary (Org)-ia Nagaland BJP Tir tasenba nem tenüngsang agütsü aser party züngsemtem dang tangatettep aser telongjem nung party aser Nagaland state atema inyaktsü ajungshia liasü.
National aser state jenjang nung party lennirtemi pa dak temulung lema Nagaland nung Tir inyaktsü shimba atema Visasolie-ia parnok dang pelaba metetdaktsü.
Taruba Assembly elections 2018 dak rangloker pai party jenjang tajungba kümdaktsütsü atema meranga inyaktsü ta Visasolie-isa nangzük.