Myanmar nung Aung San Suu Kyi-i telongpurtem ajuru

Nay Pyi Taw, Jan. 12, 2016 :  Myanmar Tatar Senden nung  “Committee for Rule of Law and Tranquility”  nung mendenbula  Aung San Suu Kyi-i Myanmar Vice President Sai Mauk Kham den yimjung asoshi ayongzükba senden ka nung salema noksa nung angur. 

Yangoon, January 12 : Myanmar nung alir kin tapu balala nungi pei pei yimten temeten asoshi rarar teloktem shia nungi tanishirtem jaoka yimjung asoshi jembitsü atema Myanmar nung tawa election nung takok angur telok National League for Democracy (NLD) nung lenir Aung San Suu Kyi-i sentong renema lir.
Nobel peace prize angula, Aung San Suu Kyii-i aniba NLD teloki taoba küm November nung agiba election nung takok tulu ngua lir, saka parnoki March ita tashi yimten menden matsüngtsü, kechiyong iba masüdang tir election agitsü anendaka lir.
Tang yimsü tesüdak saka tejenba sorkar nung tir Thein Sein-i Myanmar nung aliba telongpur teloktem den yimjung yanglutsü asoshi October nung jatep saka telok 15 rongnungi telok teneti yimjung ken o nung tangatettep kati marutet.
Iba ama mapang ka nung Suu Kyi-i telongpurtem den yimjung ken o benoka jembitsü tenzüker. Iba ken o ya Myanmar yimtiba Naypyitaw nung jembir saka tangbo takok ngua mejembitettsüa akok saka kodang NLD teloki yimten menden atsünga yimsü asü tenzükdir, idangjiang telok ajak den yimjung ken o takok ngua jembitettsü amai bilemer.
Pei kin aser pei nübortem asoshi yimten tashi aser temeten meshia rarartem teloki Suu Kyii ama alima kin ajaki metetba lenir katibo parnok temeten aser taginüba meteta ataloktsütsü amai bilemer.
” Onoki Aung San Suu Kyi dak nungi tajung tuluka imlar aser lar sorkari sepaitem den yaritepa yimjung asoshi inyaktsüla, ” ta Karen National Union nung lenir Padoh Saw Thamein Tun-i metetdaktsü.
October nung yimjung tangatettep yangluba sülen nungi iba yimjung ken o renemba nung madener o sepaitem na tsüngda rara manener.
Tang yimjung ken o jembitsü asoshi Naypyitaw nung jatepa aliba senden nung tir Thein Sein den army chief Min Aung Hlaing nungertem Suu Kyi den arua adentsü.
Myanmar nung sepai tanishirtemi dang küm 49 yimsü süogo. Ajisüaka 2011 küm dang sepaitem kija masü saka nübortemi shimtetba yimsüsürtem dena agi sorkar aküm.
Myanmar nung tamalen sepaitemi yangluba temzüng memelenshi tashi Suu Kyi tir mekümtettsü aser seapitemji yimten nung tashi tait telok ka asütsü.
Myanmar tatar senden nung pezüsü shilem nung kabo sepai tanishirtem asütsü menden wazüka yua lir aser ano sorkar nung tongtibang kilonser cabinet menden asem home affairs, defence & border affairs mapatem commander-in-chief-i dang lemtsür.