Kiralongraba anema raratsü asoshi tesempa anema raratsüla: US

New Delhi, January 13 (Agencies): Bodhbar nü United State ketdangser kati, kiralongraba anema raratsü süra India aser US ama linüki tesempa aser azütokshi anema raratsüji kanga tongtibang, ta ashi.

Civilian Security, Democracy & Human Rights atema US Under Secretary, Sarah B. Sewall-i, akumtsübutep maliba pusemba aser tamangba lokti kar anema bendanga benshiba ajanga kiralongraba anema raraba maparen nung meyaritsü, ta ashi.

New Delhi nung aliba Vivekananda International Foundation nung jembidang lai, “Sorkari loktiliba nung temzüng ozüng tasak agientettsü aser sensotemi tarentak makai jembitsü aser onük balala jembitsü lenmang lapoktsüba ajanga yaritettsü,” ta ashi.

Kiralongrabaji US aser India naprong atema tsükchir lir ta shia lai, tzüzüng ozüng benokba dang masü saka ajaki sadoka jembitettsü atema lenmang lapoktsütsüla.

“Ola madokba ajanga, taoba September ita nung Muslim nunger tebur ka tepsetba mesüra Odisha nung Tenla kitem rongdoktsüba ama temzüng alema aibelenertem aser taochi makettertem temelung uludaktsütsü,” ta lai ashi.

“Taoba mapang atalokbatem nungi tangazüktsü ngur asenoki akhümtsübutep maliba pu-masemtsüla aser tamangba lokti kar anema meinyaktsüla, iba nungji Muslim nunger asen adianu aser aianutsürtem densema lir,” ta Sewall-i ashi.

“August ita nung tali bilemloka oa inyakertemi Malleshappa Kalburgi ola nembangtsütsü atema pa tepsetba sülen India nunger ken o aser kaket zülurtemi tama ibaji aitsütsü tenzük,” ta lai ashi.

“US aser India nati tali bilemoka oa inyakertemi rara adokdaktsüba aiben ajurua aruogo, asenoki tamangba yimsü sadoka amangdaktsütsü atema inyaktsüla, ajak kümzüka alitsü aoshi inyaktsüla aser bendanga benshiba aser tesempa anema ola adoktsüla,” ta laisa shisem.