AR-i North East tensa tajungba kümdaktsü : Ibobi

Guwahati, January 13 (Agencies) : Mongulbarnü Manipur chief minister Okram Ibobi Singh-i Assam Rifles (AR) nem tenüngsang agüja jembidang AR-i Manipur dena northeast ajungalen tensa junga kümdaktsüogo ta ashi.
“Manipur nunga küm aika telungpur khuret agi timtema arur. Iba khuret ajanga nisung meyirjang aika taküm samatsüogo aser yimjung o terenlok nung tetsükdaktsü tulu bener arutsü” ta Ibobi-i ashi.
Assam Rifles ajanga ozüng alema inyakba mapa tulubalen azüokogo aser iba ajanga civil administration-i mapa shitak inyaka oteter. Ano Assam Rifles-i lendong-tsüdong balala nung aiben yaritepogo, ta Manipur chief minister-isa shisem.
Inspector-General of AR (South) ajanga Imphal nung Assam Rifles ex-servicemen’s rally ka ayongzüka agidang pai iba onük jembi.
Assam Rifle-i Manipur nung rall ayongzükba rongnung iba rally tulutiba liasü aser iba ta Director-general of Assam Rifles (DGAR) kübok ayongzük.
Sentong nung chief minister Ibobi Singh, DGAR Lt. Gen. HJS Sachdev nati anir Manipur nung AR ex-servicemen 750, World War II veteran kar, ‘veer naris’, amitsürtem aser ex-servicemen chirnurtem aika aden.