IOC, HPCL & BPCL nungeri totzü mulutetdak tulutiba yanglutsü

New Delhi, January 13 (Agencies): India nung tongti totzü telok 3 – Indian Oil Corp (IOC), Hindustan Petroleum Corporation Limited (HPCL) aser Bharat Petroleum Corporation Ltd. (BPCL) nungertem külemi lungjemer India anülulentip tsütsülen totzü mulutetdak tulutiba yanglutsü sentong renemba osang ka IOC Director (Refineries), Sanjiv Singh-i tanü Bodbar nü metetdaktsüogo.
“India anüdoklentip tsütsülen dang totzü mulutetdak tentetba yong India anülulen aser anülulentip tsütsülen alir ajangzükdaktsütsü nükjidong nung India anülulentip tsütsülena totzü mulutetdak ka tentettsü sentong renema liasü. HPCL-ia kasa alizüng yua aliba osang bushitetogo,” ta pai ashi.
“Iba tangatetba nung IOC, HPCL aser BPCL nungeri külemi lungjemer India ajunga nung totzü mulutetdak tulutiba India anülulentip tsütsülen tentettsü sentong renemogo,” ta paisa shisem.
Singh-isa ashiba agi, iba totzü mulutetdak küm nung totzü ton million 15 dak tema mulutettsü.
India ajunga nung totzü ton million 15 tashi mulutetdak ya public sector kati tentettsü renemba totzü mulutetdak rongnung tulutiba alitsü.
IOC-ia Odisha kübok Paradip nung totzü ton million 15 tashi mulutetba totzü mulutetdak tasen ka tawa tentetogo.
Tanü tashi nung Reliance Industries-i India ajunga nung totzü mulutetdak tulutiba tenteta lir.
Par teloki Gujarat kübok Jamnagar nung totzü ton millon 27 tashi mulutetba totzü mulutetdak tentetba sülen idakji totzü ton million 30 tashi mulutettsüsa yanglushiogo.
Par teloki bendanglen yokshitsü nükjidong nung Jamnagar anasa totzü ton million 29 tashi mulutetdak tanga ka tentetba osanga jangjaogo.
“Ajisüaka, IOC, HPCL aser BPCL nungeri külemi lungjemer tan tentettsü renemba totzü mulutetdakji tanga totzü mulutetba ajunga den tuluba asütsü sentong lir aser totzü ton million 1 mulutettsü asoshi sen crore 2,500 nüngdaktsü ta Singh-i osang jangjashitsü.
“India anülulentip tsütsülen tan totzü mulutetdak tentetba ajanga Middle East aser Africa na nungi bener aruba totzü timtem kecha majurui tajungba küma mulutettsü,” ta shia, iba totzü mulutetdak anasa petrochemical kiojen ka renemtsü sentong aliba osang ka pai metetdaktsü.
IOC teloki tanü tashi nung ajak agi totzü ton million 54.20 mulutettsüsa totzü mulutetdak 6 tashi tentetba den külemi, totzü ton million 11.50 shi mulutettsüsa tanga totzü mulutetdak tila ishika tenteta lir.
“Tan tentettsü renemba totzü mulutetdak totzü ton million 15 shi tan January ita tatembanglen nungi tenzüka mulutettsü. Ibaji ajanga IOC-i ajak agi totzü ton million 80.7 shi muluteter akümtsü,” ta Singh-i sangoktsü.