Football asayar mongin, Ronaldinbo-i India semdangtsü

New Delhi, January 13 (Agencies): Football asayar mongin, Brazil nunger Ronaldinbo-i tan January ita tatembanglen India semdangtsü sentong renemba osang ka angazükogo.
Ronaldinha ya 2002 World Cup asayamong takok marok anguba Brazil telok nung densema pai iba asayamong nung tongti shilem agia liasü.
Taoba Barcelona aser AC Milan asayar, Ronaldinho-i küm 21 nung tan mezüngsüa asentenshia, Kerala kübok Kozhikode nung agitsü ayongba Nagjee International Club Tournament (NICT) lapoktsütsü renema lir ta The Times of India osangi sangoktsü.
Iba asayamong ya taruba February ita 5 nü nungi ang asaya tenzüktsü renema lir saka Ronaldinbo nübo agitsü nükjidong nung asayamong tayongeri asayamong lapoktsü sentongji tekaraba mapang nung agitsü renem.
Ronaldinho-i tan January ita 24 nü Kozhikode tonga aoba sülen tasüng, January ita 25 nü asayamongji lapoktsütsü sentong renema lir.
“Ronaldinho ama football asayar mongin kati asayamong lapoktsütsüji maongka tulu angur lir,” ta Kozhikode Football Association (KFA) nung Secretary, P Haridas-ia metetdaktsüogo.
Ronaldinho-i taoba mapang, 2012 nunga India semdanga liasü saka pai tan mezüngsüa football asayatsüren den sentaktepa India semdangtsü sentong renemer lir.
Yaküm, 2015 küma Brazil nunger football asayar mongin, Pele-i India semdanga 2015 Subroto Cup asayamong nung tongti tesemdanger ka ama iba asayamong lapokja liasü.
NICT asayamong nung shilem agitsü asoshi South America nungi Europe tashi bendanglen tentetba football telok 7-i terenemshiba agia lir.
Kasa asayamong nung India’er Under-23 telok nema shilem agidaktsütsü asoshi asayamong tayongeri sentong renemba osang angazükogo.