Sydney: Mirza o Hingis nati otsü tasen ka yanglur

Sydney, January 13 (Agencies): India tsür, Sania Mirza aser Switzerland tsür, Martina Hingis nati tang tasayadak WTA Sydney International semifinal asayatsü jenjang ngua otsü tasen ka tanü Bodbar nü yangluogo.
Mirza o Hingis nati tanü asaya 28 tashi atonga akoker küma Puerto Rica tsür, Gigi Fernandez aser Belarus tsür, Natasha Zvereva nati taoba mapang, 1994 küm yangluba tetsür doubles asaya timba atonga akokba otsü menepogo.
Tan asayamong nung temaba jenjang abener, Mirza o Hingis nati tanü ghonda ka tekübok nung points 6-2, 6-3 ngua China’er Chen Liang o Shuai Peng na tsükdakja tetsür doubles shilem indang semifinal asayatsü jenjang ajangzük.
Yaküm 2015 küm Indian Wells, Miami, Charleston, Wimbledon, US Open, Guangzhou, Wuhan, Beijing aser WTA Finals aser taoba hopta Brisbane International takok marok agizükba densema, yaküm nungi tanü tashi nung Mirza o Hingis nati aroki lungjemer WTA takok marok 10 tashi agizüka lir.
Mirza o Hingis nati Timea Babos o Katarina Srebotnik aser Raluca Olaru o Yaroslava Shvedova na tsüngda takok angur den semifinal nung ajuruteptsü.
Ano külen, Romania tsür, Simona Halep-ia Czech Republic tsür, Karolina Pliskova madak takok ngua tetsür singles shilem indang semifinal asayatsü jenjang tanü nguogo.
Tetsür World No. 2, Halep-i tanü ghonda 1 ser minute 38 nung points 6-4, 7-5 ngua Pliskova tsükdaktsü.
Halep-i taoba World No. 2, Svetlana Kuznetsova den semifinal nung ajuruteptsü.
Russia tsürla, Kuznetsova-ia tanü points 7-6 (7/1), 6-0 ngua Italy tsür, Sara Errani madak takok ngua semifinal asayatsü jenjang angu.