Amit Shah Tir shimshiba sülen Cabinet melenshitsü akok

New Delhi, January 13 (Agencies): BJP Tir Amit Shah tanaben Tir shimshiba sülen Centre sorkar nung tongtibang telemtetba aika agitsü akok aser cabinet menden kar melenteptsü akok, ta osang ka ajanga metetdaktsü.
Taküm state pongu nung assembly election agitsü aliba nung rangloker Ato kilonser Narendra Modi-i yimsüsüba tsütsü nüburtemi temulung asütsü süa inyakner aser cabinet nung tejak tasenpur kar anioksemtsü asoshi bushir.
Tongtibang portfolio pezü- home, finance, defence aser foreign ministry nungbo temelenshi malitsü akok, ajisüaka ministry mapa junga mebenteter minister kar anendaktsütsü mesüra tanga ministry agi melentsütsü akok, ta kasa osang ajanga ashi.
Junga yimsüsütsü atema ministry kar melenteptsü akok aser ministry junga benteter minister kar nembo ano ministry repsema inyaktsü nungloktsütsü akok.
Osang angazükba agi, yaküm November ita Bihar assembly election nung tamakok kanga mejungi anguba nung ajemdaker Modi-i Bihar nungi Union minister karbo anentsütsü akok.
Ajisüaka item ajakji Shah tanaben Tir shimshiba aser pai office ketdangpurtem melenba sülen ang ataloktsü akok.
Shah tanaben shimshitsü imlar.
“Election ya telok ka ajanga shimer. Pai inyakba mapa apir nisung ajaki ano pa tanaben Tir aginür,” ta party general secretary, Kailash Vijayvargiya-i ashi.
Ano küm asem Tir inyaktsü atema shimra 2019 küm Lok Sabha election nung Ato kilonser Narendra Modi atema pa leniba nung nüboyim sentong akatsü.
2016 küm West Bengal, Kerala, Tamil Nadu, Assam aser Punjab nung election agitsü aser 2017 küm Uttar Pradesh nung election agitsü.