Pathankot amaktsü tasa atonger JeM tanishir Azhar puogo

Islamabad, January 13 (Agencies): Pathankot kiralongraba mapa inyaktsü tasa atong ta India-i tai tongloktsür JeM tanishisang Maulana Masood Azhar, Pakistan nung puogo.
Pakistan media osangtem ajanga ashiba agi, Mohammad tanishisang Maulana Masood Azhar ji Pakistan nung mejangjangtetba tesem ka nung apu.
2001 nung kiralongrartemi Indian Parliament amakba ken o nunga India-i Azhar dak tai tonglokja lir. Iba lendong nung kiralongrartemi nisung 9 tepset aser sepaitemi par ponguprongla kahset.
Ano, Azhar tenu Abdul Rehman Rauf-a ketdangsertemi pua lir aser tena dang Pathankot kiralongraba mapa atema asüngdangya südar, ta media osangtem ajanga metetdaktsü.
Pathankot amakertemji Pakistan nungi aru aser parnokji Azhar-i aniba Jaish-e-Mohammad züngsemtem liasü ta temulung melemi bilemer.
India-i takhangba agütsüba nung ajemdaker Bodbarnü Pakistan-i Jaish-e-Mohammed kiralongrar 12 tashi puogo.
Temulung melemi bilemertemji Punjab (Pakistan) kübok yimti balala nungi apu, ta Daily Pakistan ajanga metetdaktsü.
Pakistan media osang ajangasa ashiba agi, ketdangsertemi Bahwalnagar, Bahawalpur, Multan aser Muzafargarh yimtitem nung JeM office tem shibangtsüogo.