Italy nung aliba museum nisung million 43-i semdang

Rome, January 14 (Agenceis): 2015 küm Italy nung aliba museum aser akhi mapang indang osettem reprangtsü asoshi nisung million 43 arua liasü aser ibaji ajanga otsü tasen ka yangluogo, ta Culture Minister Dario Franceschini-i ashi.

“Linük otsü nung nisung timtibai Italy museum semdangbaji 2015 küm liasü,” ta Franceschini-i ashi.

2015 küm museum ajanga linük nem sen Euro million 155 tajangzük bentsür aruogo.

Tesüiba küm ana dang nungi 2015 küm nisung million 4.5 agi timbai linük indang museum semdanga liasü aser iba rongnunga yaküm kija nung nisung million 2.5 agi timba liasü, ta Franceschini-isa ashi.

Italy nung aliba museum semdangtsü asoshi nisung timba aruba ya sorkari asameyang tasen ka amshiba ajanga lir. Parnoki Deobarnü museum semdanger dang sen taa kecha magitsü lemtet, ta pai shisem.

2015 küm nisung timba kati semdangba tesemji Rome nung aliba küm 2,000 tejen Colosseum, nisung million 6.5-i semdang aser Roman city of Pompeii, nisung 2.9 million-i semdanga liasü.