Kaketshir 9 nem NI Jamir Award agütsü

Kohima, July 19 (TYO) : 2015 küm Nagaland Board of School Education-i agiba class 10 tatidang (High School Leaving Certificate exam.) nung takok angurtem rongnungi tematiba takok jenjang 20 buba tashi nung takok angur Aoer kaketshir par tuku nem Honibar nü Molu ki, Kohima nung sentong tajung ka lia N I Jamir Academic Excellence Award agütsüogo.
Iba sempet ya taküm 2015 küm agi tukubenbuba agütsür. Iba sempet ya Ongpangkong Telongjem Kohima ajanga asür N.I.Jamir kinüngertemi agütsür.
Taküm iba sempet agizükertemji Loktimen (Satsükba), Imtijungla (Süngratsü), Lanumongba Imchen (Longkhüm), Imlilong Jamir (Chungtia), Bendangkokba R Jamir (Aliba), Akumsenla Jamir (Chuchuyimpang), Bendanglemla Imsong (Longjang), Meyisunep (Chuchuyimlang) aser Mongyanger Longkumer (Waromong) nungertem liasü.
Iba sempet agütsüba sentong nung tongti o jembir, Inspector General of Police (Range), Wabang Jamir-i jembidang, tanü kaketshir aser lanurtemi akhi tetsü teboutemi benshia aruba sobaliba aser temetetba shisatsütem shia arudakja amshitsü kanga nüngdaka kümogo ta metetdaktsü.
Naga nungertem dak tekolok aser shisatsü liaka, itemji amshia tejakleni moutetbaji nisung ajaki sorkar mapa nung dang metaloker linüba agi lir, anungji iba tangatetbaji melenshitsü nüngdaker ta Wabang Jamirisa metetdaktsü. Paisa 2015 küm N.I.Jamir Award ngutettsüsa class 10 nung takok tajung ngutetba purtem ajak nem tenüngsang agütsü aser iba ama sempet agüja kaketshirtem ajungshiba atema Ongpangkong Telongjem, Kohima aser N.I.Jamir kinüngertem dang pelaba metetdaktsü.
Iba sentong nung N. I. Jamir’er kinünger tenüng nung jembidang, taoba Nagaland Chief secretary, Wb.Alemtemshi Jamir-i lokti ka tejakleni aotsü atema nübortem rongnung kati ka sangtepa aser yaritepa aotsü nüngdaker ta metetdaktsü.
NIJT Trustee, Limameren-i ashiba agi, iba sempet nung sen Rs.10,000 den tenüngsang kuli kaket kaka dena lir aser NBSE-i agiba HSLC tatidang nung tematiba takok jenjang 20 tashi nung takok angur Aoer kaketshirtem nem agütsür.
Kasa sentong nung 2013 Hornbill Kids Carnival winner, Sentienla Kichui ken tajung ka tena liasü.