68buba Asetkong Mungdang Longpa nung mungdar

Longpa (Mokokchung), January 14 (TYO): 68buba Asetkong Mungdang (Asetkong citizens’ conference), tang Longpa yimtak temungdak lir. Asetkong sanger ajak agi nisung 300 shi iba mungdang nung shilem agidagi.
Mungdang tenzüknü tongti o jembir, Government College Dimapur nung Assistant Professor, Dr Benjongkumba Imchen-i ‘lipoküm wazüka aser kümzüka ayuba nung lokti ka teinyaktsü’ onük nung ajemdaker state, linük aser alima ajak nung nüburtemi ajuruba tebilemtsü balala lemsatep.
Pai, alima nung aliba süngdong lidong aser shirurutem den alimang o ali telung aser tema nung aliba rongsentem ajak ya Tsüngremi nisung nem ketdangsüdaktsütsü nungloktsü. Ajisüaka nisungi tarutsü atema mebilemdangi itemji raksar aser ibaji ajanga tanü alima lipoküm tsütsü tebilemtsü aika adoker, ta Laishiba nung ajemdaker ashi.
Alima nung aliba kechisarena wazüka aser kümzüka ayutsü asoshi küm 100 tejakdang nungi jembia arur ta shia Ashoka-i azü metokshi jembiba o bena arua lemsatep.
Dr Benjongkumba-i, “Iba dak sentakba onük ya tanü tasen jembir masü, ajisüaka lipoküm tebilemtsü ya tang rongdak nüngdak ka kümogo, kechiba süra tsüngküm mongpu melenshiba aser alima tatsük akümba ya akhidang dang nungi tang tamajungba kümogo. Ano süngdonglidong aser shiruru aika sama-a aoba den arem shiruru alitsü tesem melii moapu akümer. Alima nung nütsüng yongsük timba akümer aser tzü mopung tebilemtsü ulura kümogo,” ta ashi.
“Iba dak sentakba nung Asetkong sangeria kechi shilem agitettsü (?)” ta pai asüngdanga liasü.
Alima tsütsü nungi reprangdangra, iba tebilemtsü atema alima nung alir kija shiai shilem agitsü nüngdaker aser ibaji ajanga dang alima merüka akümtsü, ta pai ashi.
Anungji pai Asetkong sanger sendena alidak aluyimba yimya tajungba küma melenshia arem min tulu chirepa aluyimba yimya entoktsü ajungshia liasü.
Asenoki leprepba aremtem melentsü asoshi süngdong tsünütsüla ta paisa ajungshi.
Paisa, alu nung mesen asüba mozütem mamshitsü aser yimtak alir lanurtemi lijak den air-gun amala mamshitsüla. Iba den külemi ango apudang ayongtem nung tapoktsü mesüra mozü tesashi den battery mamshitsüla ta ayongzük.
Item temelenshitem amshitet nungbo Asetkong sangeri lipoküm wazüka aser kümzüka ayuba tsütsü shilem tulu ka agir asütsü, ta Dr Benjongkumba-i ashi.
Asetkong Students’ Conference (AKTM) nung Tir, Rongsennukshi Aier-ia sentong nung o jembia liasü aser iba mapang pai, Asetkong Mungdangji AKTM asoshi tebuti lir kechiba süra parnoki nüngdak ajak nung nungita yarir ta pelaba lemsatepa liasü.
Rongsennukshi-i, tang alima ya lanurtemi melenzüktsü mapang ka lir anungji tantsü-tambutemi lenmang ajak nung maneni lanurtem ajungmesoa yaridaktsüner, ta Asetkong Mungdangsanger ajungshia liasü.
Pai, lanurtemi tsüraburi ashiba mesendoki parnok akhümtsübua par tsüngsü tajung nung jajatsüla aser tsüraburtemia lanur ka taginüba den tejangrabatem angatettsü nüngdaker, ta ashi.
Iba sentong nung Longpa village council chairman-i tesentepertem pelaa agizük aser Longpa Baptist Arogo nung Sannükeri sentong tenzüka sarasadem. Ano Longjang village council chairman-ia tajungshi o jembia liasü.
68buba Asetkong mungdang ya Hokolbarnü tembangtsü aser iba sentong nung Parliamentary secretary, geology & mining, Dr Imtiwapang Aier tongti tesemdanger asütsü.