Mirza o Hingis na Sydney International final-i iogo

Sydney, January 14 (Agencies): India tsür, Sania Mirza aser Switzerland tsür, Martina Hingis nati semifinal asaya koka tang tasayadak Sydney International asayamong tetsür doubles shilem indang final asayatsü jenjang tanü Brehostibar nü ajangzükogo.
Mirza o Hingis tanü points 4-6, 6-3, 10-8 ngua Romania tsür, Raluca Olaru aser Kazakhstan tsür, Yaroslava Shvedova na semifinal asaya nung tsükdaktsü.
Tanü takokba anguba sülen Mirza o Hingis nati aroki lungjemer asayatsü tenzüker tanü tashi nung asaya 29 buba atonga akoker küma, Gigi Fernandez o Natasha Zvereva nati 1994 küm yangluba asaya 28 atonga akokba otsü ajangtetogo.
Mirza o Hingis nati maneni Czech Republic tsür, Jana Novotna aser külem senotsür, Helena Sukova nati tesüiba mapang, 1990 küm yangluba asaya 44 tashi atonga akokba otsü ajangtetsü alizüng ayu tenzükogo.
Yaküm 2015 ayongba tongti asayamong 9 tashi indang takok marok agizüka tetsür doubles shilem indang World No. 1 akümer, Mirza o Hingis nati tan final asaya koka Brisbane International takok maroka agizükra, tenati taküm 2016 küma tanabuba takok marok agizüker akümtsü.